世界上最難搞的關係，可能就是奶奶與新抱的「婆媳關係」吧！要處理好婆媳關係，真是一門非常高深的學問。不少新抱都表明婚後不願與奶奶同住，但現實中往往不會那麼順利。有自稱新抱在「同住奶奶好惡頂」的 Facebook 群組內，發文大呻老爺奶奶借錢給他們夫妻二人付首期買樓後，新屋的裝修竟要全聽奶奶的意思，之後奶奶更想搬到新屋同住，令新抱大嘆「買咗間無得自己話事嘅屋！」
【相關報導】
樓主指，老爺奶奶認為租樓不穩妥，有可能隨時被業主趕走，所以即使樓主表明無錢買樓，兩老仍堅持借出首期讓樓主夫妻買樓，而餘下的款項則由夫妻二人每月供款。不過，奶奶竟著樓主與丈夫寫欠單，內容大概是指要好好孝順兩老，否則兩老隨時可「收返層樓」。樓主續指由於兩老「計錯數」，所以那筆錢只夠付首期，卻不夠裝修，不過由於新屋整體尚算新淨，樓主認為毋須裝修亦可入住，只需添置些家電便可，惟此舉卻令奶奶「開始黎料！」
樓主指「奶奶講返 n 年前我地女家無比禮金男家，又無買車又無買樓，佢都無睇我唔起，而家佢地比咗首期，我地女家好應該比裝修錢」，而且奶奶不但堅持要裝修，更要大裝修，既要重新間格，又要全按自己的品味，甚至連裝修圖都畫好，樓主指「估計至少 60 萬！但要我屋企人比，重要必須留間房比佢地退休黎睇同孫一齊住。」
樓主無奈地表示「奶奶本來十級難頂，比首期原來想一齊住。而家我地無啦啦借銀行幾百萬，每月供款重貴過租，重要以後同老爺奶奶一齊住」，大呼「我可唔可以唔接受佢地既大禮呀？！還我自由！！」另外，樓主亦指夫妻二人本身已有自己的計劃，但卻被奶奶的「買樓大計」破壞了，「本來諗住 2 公婆儲錢抽居屋，好喇，一下子咩都無哂。無啦啦多咗層住得唔自在既樓，用咗個名，連抽居屋既機會都無埋。」現在更要每日受奶奶氣，周不時便會單打樓主家人沒有付裝修錢，希望可以終有一日逼得女方出錢裝修新屋。
此帖一出後，已有不少網民笑為何結婚要女方付禮金：「女家冇俾禮金男家？ 又冇買車又冇買樓？ 99 住喺非洲架？」、「 我睇咗啲乜？點解結婚要女家俾禮金？仲要買車又買樓？佢想自己個仔入敘女家吖？ 個仔嫁入女家會唔會跟埋老婆姓吖？請問個位一心諗住個仔食軟飯嘅奶奶？」、「佢嫁果陣大有冇比禮金佢奶奶呀？」、「呀奶奶邊度鄉下傢？佢鄉下要女家要俾禮金男家？你鄉下要男家送兩層樓傢喎。」
同時亦有網民獻計給樓主：「將層樓放租，然後自己租屋住。仲可以好理性分析，搵人供樓，自己租間平啲嘅住，可以儲多啲錢。總之拖佢裝修（租比人無謂浪費），拖佢一齊住。」、「將層樓過返俾佢，叫佢自己供返! 你兩個自己租樓。」、「放租啦！自己搬返出去租屋住，有咁遠搬咁」、「住夠三年放左它，還錢比奶奶連利息，自己再買過」、「叫佢自己住返。」
【相關報導】
【相關報導】
Source：同住奶奶好惡頂@FB 、TVB《BB來了》劇照