打工仔下班放假，可以唔覆上司傳來的 WhatsApp 短訊嗎？網民「孤單的肥牛」日前在香港討論區發帖，題為「收工同放假仲要睇 WhatsApp」，發人深省。樓主在帖子苦訴：「我通常收咗工同放緊假去旅行，唔睇同唔覆 WhatsApp 都好正常啫。」他續稱：「點知我上司鬧我呢啲時間唔睇又唔覆 WhatsApp！」嘩！天理何在？
樓主不解：「我心諗難道呢啲放鬆嘅時間都要睇同埋回覆 WhatsApp 先叫正常？工作時間同休息時間，我是分開，我唔想個腦 24 小時都是諗著工作，讓大腦可以放鬆一下，紓緩壓力。」他出力控訴：「佢以為每個人都要好似佢及老闆咁，24 小時 on call，冇自己嘅私人時間，要非常勤力去回覆上司及老闆的 WhatsApp, 先至叫最幫得手嘅員工咩？我真是冇眼睇！」樓主補充：「我係睇完即刪唔覆，唔想放工同放假都要記掛著工作，即是驅殼放緊假，個心仲掛著工作，即是同冇放假，未收工冇分別」。
網民：「上司唔覺佢有問題仲要大言不慚咁鬧你」
帖子擊中不少打工仔內心深處，網民紛紛讚好，熱烈討論。有網民突破盲腸：「問題已經唔係放工 / 放假熄機唔睇，係上司會響你返工時鬧你話你放工 / 放假唔睇唔覆 WhatsApp，呢種事後追究，仲要唔覺得佢有問題仲大大聲大言不慚咁鬧你，你唔通鬧翻佢咩，除非你唔撈咪可以回敬佢囉」。
「未有 WhatsApp 嘅年代，公司一樣 call 你」
有網民呻要住宿舍：「其實未有 WhatsApp 嘅年代，公司一樣會喺你放工後 call 你（如果公司仲有人返緊工），我又唔覺有太大分別。最好真係有事先搵我囉，唔急嘅事搵自己就好煩，急嘅事我就情願你搵我，即刻處理咗佢，好過等到我返工先搞，可能已太遲，變咗孭鑊。我都試過放工如同未放工嘅感覺，係以前做常平啲廠，放工返宿舍，同同事一齊住，感覺就真係似未放工。」
「有緊要事打電話俾我，唔好 WhatsApp」
有網民叫腦細直接來電：「有次我老細問做乜唔覆，我話我唔睇 WhatsApp 嘅，我同佢講話如果你屋企火燭，你打 999 定 WhatsApp 俾消防呀？有緊要事你可以隨時打電話俾我，我一定聽，但就唔好 WhatsApp 我。之後佢一次都無 WhatsApp 過我。唔知點解好多老細少少事就會 WhatsApp 你，但叫佢有乜事打電話講佢又唔會打嚟喎。」
有網民教路：「好簡單，用第二個電話 for 家庭。一個電話係開工前半小時開。工作心得，開工先開的話，同事塞車就大檬樂。所以開工前半小時，放心（工）後離開間公司大厦先熄，咁就享受時間。」
其他網民留言，節錄如下：
- 如果是過客，就無問題的。你唔覆多幾次，佢就習慣了。
- whatsapp 係好方便,但同樣又係一種好恐佈嘅嘢
- 冇出錯當然冇問題啦，有出錯而又影響公司其他部門運作就......
- 當其他群組成員都睇都覆，你可以唔睇唔覆咩？我哋公司都好啲，用詞係傾偈式廣東話口語。有朋友個老細 whatsapp 都用 formal 商業英語，睇又煩覆又煩。
- 呢 d 垃圾工做唔做都罷，直接劈炮啦
- 你話旅行個陣無上網
- 你用非智能電話就得啦
- 睇工種啦，唔死得人嘅，梗係唔覆啦
【精選消息】
【精選消息】
Source：香港討論區