香港有不少小店都會在收銀處寫上「拒收 $500 / $1000」的字句，一來可避免收到假鈔的風險，二來可減少零錢不足的問題。不過近日有在茶餐廳任職的網民在 Facebook「西客之道」專頁投稿，分享有 OL 在其任職的餐廳點了約 $30 的茶餐，但結帳時卻以 $1000 付款，更稱「就係想你找散紙俾我！」最終要苦等了 1 小時後才能拿回 $900 多元的找續，令 OL 一度崩潰指「我返工遲到，我比散紙你埋單啦！」
【相關報導】
樓主指，自己在一家平民餐廳內工作，由於價格實惠，平時很少機會會有客人會以 $500 或 $1000 來支付帳單，所以當該名 OL 拿出 $1000 埋單時，已清楚表示「小姐，有冇細張少少嘅？冇咁多散紙找唔開」，對方卻指「冇喎，我就係想你找散比我呀嘛！」於是樓主便再次指，現在店內沒有足夠的 $100 找續，並問「我找哂 10 蚊紙同 20 蚊紙比你得唔得？」但對方又指「散成咁梗係唔得啦」，所以樓主便再次提議對方「咁你一係放低啲嘢係到抵押，出去唱散完返嚟埋單得唔得」，可惜對方又再次寸爆回應「點解要我放低啲嘢做抵押呀，你地自己出去唱囉，我而家比左 $1000 等住你地找返 900 幾蚊比我呀！」，之後樓主表示「其實我就望到你個銀包入面藍色，緣色，紅色都有嘅，都係要拎張金色出嚟我就唔好怪我地唔客氣啦」，便請同事外出為 OL 唱錢。
如是者，OL 等了 30 分鐘後，已經不耐煩地問「得未呀，你地係咪偷錢架，咁耐嘅」，樓主則解釋由於早上銀行較多人排隊，所以等候時間比較長，並請對方再耐心等待，再過了 15 分鐘後， OL 指自己要趕時間上班，更自爆「其實我有散紙架，我而家就埋單，唔洗唱散好唔好？」，但樓主則以「但我地同事出左仲未返，仲差你 900 幾蚊未找返呀！」為由，要求對方再耐心等待，最終 OL 等了 1 個小時才能從餐廳離開。事後，樓主則稱「希望咁多位貴客要知道舖頭係冇義務去幫各位打散你地啲大紙，一個係咁兩個咁，個個都係咁…係咪各位搞錯左啲咩呢？」
此帖一出，已經引來網民熱論，不少網民紛紛嘲笑該名 OL ，「一開始自己有嘅就比散啦！態度又咁西！抵比人玩」、「睇完好爽！你點對人 人點對你姐」、「我成日都咁講 , 對付呢啲人, 你要做得誇張過佢十倍, 五十倍, 一百倍, 咁佢先識衰！！」，更有網民想出更毒的招數，「找 900 幾蚊散紙比佢叫佢唔好喊」、「 貼張告示，500,1000 不設找續，一律當貼士」、「收銀姐姐錯誤位，應該是這樣說：「小姐有無一百蚊紙？如果無，我就找晒全部廿蚊紙畀妳，妳都係想我找散比妳呀嘛，呵？」萬試萬靈，一定自動換過一張一百蚊紙畀妳！」
【相關報導】
【相關報導】
Source：西客之道@Fb
Photo：經濟日報圖片庫（示意圖）