32 歲巴打分享「5 年擁 3 物業」秘技!網民問:捨得俾辣稅?

| 柔之拔 | 09-05-2019 15:21 | |

香港住宅樓價高企,有人一世打工為了供樓,有人窮一生都未能上車。世事無絕對,有網民在網上討論區發帖,分享自己在 5 年內擁有 3 幢物業的心得,卻又擔心有潛在風險,遂向巴絲請教「5 年擁 3 物業」有啲咩要注意;截稿前,帖子贏得 36,215 個點擊,不少網民踴躍留言,葡萄的多,羨慕較少。

網民 mahofai09 日前在香港討論區發帖,題為「小分享。5 年買 3 間樓」。樓主在帖子表示:「好想同大家分享,今日終於做到三層樓」,以下是樓主按時序自白 5 年內擁 3 物業兼娶妻之路:

1】個人儲蓄 all in 單幢私樓

2015 年,28 歲的巴打用盡 5 年儲蓄買入九龍城一個單橦式私樓。樓主表示,該單位在當年以 HK$500 餘萬成交,現在已升至約 HK$900 萬;現放租。

2】太太抽到居屋

2017 年,當年的女朋友(現為太太)抽到牛頭角居屋小單位,女朋友支付 HK$28 萬首期,樓主負責供,至今仍住在這裡;未補地價,太太是這個居屋單位的業主。

3】今年買入第三間

2019 年,巴打得到了「人生第三層樓」!他表示:「連埋 DSD(編按:雙倍從價印花稅)同老婆加埋比左 300 幾萬首期,買左第三間樓」。

夫妻只剩 $30 餘萬

不過,樓主擔心成為 3 間樓的業主有好大風險:「因為而家我同佢都加埋都係剩返 30 幾萬,下年 11 月入伙,打算放租。好多人都話我新樓放租好浪費,不過老婆好鐘意果道,可能過幾年將層居屋會補返地價之後換間細私樓 之後就住呢度 。」

買樓絕對唔會錯?

樓主謙虛,成為人生贏家不忘感謝太太:「雖然呢個唔係我一個人既功勞,我老婆都出左一百萬左右既助功,但都總算一個家庭有 3 間屋。」他卻又擔心:「真係唔知我既決定係岩定錯,但我都係相信買樓就絕對唔會錯,雖未知下一步會係點。」

網民甲羨慕:「DSD 都俾,楼主好勇」,樓主搖頭 emoji 回應:「想要埋第三層樓,無辦法。」網民庚稱:「恭喜,我同老婆只準備買第 2 間,師兄咁捨得比 15% 辣稅?我見有人教可以用近親買賣佢轉比係或你轉比佢只係收返舊稅,而另一位即時回復首置。」。

網民:「點解唔做近親轉讓?」

網民丙好奇:「點解樓主唔做近親 xx? 可慳唔小。但都恭喜你!!!!!」樓主反問何謂「近親 xx?」,網民丙教路:「近親轉讓。可慳唔小稅。如你將手上,幾個物業,轉晒俾老婆,咁你即變光頭仔,即無樓人士。每次當你重新買樓時,就只當你第一次買樓咁計稅,勁平架!!」

老婆懷孕大壓力

網民乙大讚:「師兄勁呀!」,樓主反問:「唔知呢個決定會唔會太搏 ?」,網民乙回應:「唔買都買左, 最緊要係睇下一旦是旦一個失業, 可否有儲備頂一年半载, 有就唔使驚。」,樓主解釋:「呢段時間好大壓力,我老婆岩岩有左兩個月,但我知道小朋友如果出左世先買,就好難再有機會第三層,但我預期呢份工應該可以做到最少多 2-3 年 如無意外的話。」網民乙稱:「又唔使咁担心, 真係唔掂咪賣左第一或第二間, 到時 3 年 SSD(額外印花稅)都過哂喇。」

做好 infrastructure 為 40 歲準備

網民丁:「有咁多投資可以做,點解要呢一刻買樓? 同埋如果你 15 年買 500 萬九龍城,都唔會係大單位,點解唔換間大的舒服自己?」樓主:「我唔叻投資 所以買樓比較風險低同容易。至於住得舒服 我都諗左呢個問題好耐 同老婆鬧過好多次交 因為佢想住私樓 但我覺得而家先 32 歲 我想做好左個家庭既 infrastructure 之後36,37 歲後就可換間大 D 而又有兩間樓收租。我成日覺得呢一刻住得靚 住得舒服咁又點 最重要係 40 歲後要make sure 有財務自由,唔知岩定錯。」

【精選消息】香港住宅平均樓價連續 5 年冠絕全球 網民:香港大把世界第一

【精選消息】調查指逾 6 成港女認為男士有物業較吸引 有樓有分加

【精選消息】日本「車站上蓋」物業名副其實 0 分鐘到達月台

Source:香港討論區

相關文章

Page 1 of 18