假如你是打工仔，上班回到公司大堂，發現升降機發生故障正在緊急維修中，辦公室位置在廿多樓層，你有啲咩要注意？有巴打在網上討論區發帖，闡述一次趕時間上班卻遭遇升降機壞掉的苦況。對於有運動習慣的這個巴打而言，升降機故事事少，但壞 lift 事件竟令巴打意外從同事們的反應，睇盡人性醜惡？
「公司廿幾層 行上去唔難」
是這樣的。網民 bear332 日前在香港討論區發帖，題為「一壞 LIFT，就睇到人性既醜惡」。樓主在帖子分享一次返工壞 lift 遭遇：「前日公司三部 LIFT 都壞左，個個人都要行樓梯，公司就廿幾層，而果陣時距離打卡時間仲有十幾分鐘，講真要行上去唔難，但我就係呢個超短時間，睇到人性既醜惡囉！」
壞 lift 面前 3 種人性醜惡
就在這趕時間上班竟壞 lift 的千鈞一髮之際，樓主遇見了 3 種同事，睇盡了 3 種人性醜惡。
1) 女同事「想搭順風車」
當我話跑上去既時候，竟然有幾個女同事叫我幫手拎埋佢張卡去拍，而唔係跟埋我一齊跑！
2) 上司令下屬致電老闆 老闆玩失蹤
有個 teamhead 級話呢個情況一定要打俾老闆同佢講，但結果係叫佢既下屬打過去，結果老闆冇聽到，唔知係邊。
3) teamhead 指遲到就係遲到
另外一個 teamhead 級既話就唔理點都好，遲到既話就當遲到，但個 teamhead 就一早返到 office 做野，unun 腳咁講。
老老實實，你是屬於上述哪一種？抑或在你身邊也有這類同事嗎？
最後冇幫同事
樓主續稱，愈來愈多同事返到公司大堂，愈來愈多人鼓譟。樓主知道，但樓主不說。結果樓主沒有理會同事們，在距離遲到僅餘 10 分鐘的情況下，跑樓梯上去打卡。樓主自爆：「廿幾層係好辛苦，跑到扯哂蝦出哂汗，但岩岩好打到卡」。樓主不屑仍在公司大堂「等運到」的同事們，寄語同事們：「好心你班 OFFICE 友就得閒做下運動，唔係遇多幾次呢個情況，俾人炒架啦」。
網民：「驚你腦細條鐵」
截稿前，帖子贏得 10,794 個點擊瀏覽，77 個回應。有網民表示：「橫掂都遲到，大家一齊去食個早餐然後再返嚟行樓梯」。
有網民疑以下犯上：「集體遲到咪得囉驚你腦細條鐵咩，再嘈玩埋集體辭職都仲得」。
有網民突破盲腸：「樓主奴隸黎？廿幾層都跑上去返工，做壞規矩就係你呢 D 人，呢個情況緊係去食個早餐先啦。」樓主回應：「我果日要 lunch 前交個 project，趕唔切唔通我要同個客講壞 LIFT 交唔切咩，行樓梯就岩架啦，順便打埋卡，不過我冇諗咁多同事連行樓梯都唔行姐」。
有網民反轟樓主自私：「咩商廈黎架？！全部 lift 壞晒？！樓主，其實你已經曝露左『唔益人』既自私心態，到底誰醜惡？！」
其他網民留言，節錄如下：
- 20 幾層，聽見都辛苦
- 以上 D 反應全部正常, 人不男都係醜惡架啦~第一日做人?
- 我 office 喺 L3x，走火警時要走到地面，所以我嗰日一定失蹤
- 攞病假啦
- 盡顯高尚港人本色
- 返工仲要打咭，唔用指模咁落後
- 貢少事都諗一餐，人生會好忙。
- 智商高低的分享。可以說勤勞、但是解決困難能力不足。應該是最低階人員。
【精選消息】
【精選消息】
Source：香港討論區