日本 Docomo 4G 上網卡，有效期通常只有 8 日至 10 日。今次鴨記新返一款日本 Docomo 4G 上網卡，賣 HK$168 可用 30 日 4G 無限上網，遊勻成個日本、又或者親友同事夾啱 1 個月內去幾個 Trip 用都 OK！
呢款 Docomo 4G 上網卡係由 CMLink 推出，有留意 ezone.hk 嘅話，相信都見過 CMLink 外遊上網卡，有幾次用非常進取嘅價錢吸客，當時嘅外遊卡主要用 CMHK 數據漫遊服務。不過，CMLink 另有同海外嘅電訊商合作，為當地華人提供流動通訊，最近就同日本 Docomo 合作推出 30 日嘅 4G 無限上網計劃。
鴨記新返呢款就係租 Docomo 網絡嘅 MVNO 卡，iPhone 要裝描述檔、Android 機要 set APN（APN：cmlink.com），30 日提供 4G 無限上網，首 8GB 為不限速 4G 上網，其後限速至 384kbps。此外，30 日有效期過後，此卡還有 3 日寬限期，讓大家決定是否增值繼續使用，該段期間都會以 384kbps 提供無限上網，實際可用期為 33 日。
不過 8GB 高速流量是否足夠，都要視乎大家會否睇片。如果係幾 Group 日夾幾個短 Trip 咁玩，就要夾好唔用太多數據，否則臨尾接手嘅朋友，就要全程捱足 384kbps 了！
Source：ezone.hk、桂林街粉紅色排檔(新香園對面)