戰爭槍GAME名作《戰地風雲5》終於推出，身為一個忠實男友（BF）點可以再等，立即第一時間買GAME喇！上集《戰地風雲1》玩一戰概念感覺唔錯，今次用返同一個風格出《戰地風雲5》打到去第二次世界大戰，再打返納粹德軍真係好有經典感覺。最好嘅係今集遊戲都繼續有單機模式「戰爭故事」，唔會好似其他槍GAME顧此失彼，淨係得返個網上對戰。今次單機都有4個小故事，由北非打到北歐挪威，再打到法國普羅旺斯，有萬里黃沙又有北極光雪地夜襲，玩起來好有自由同好有Feel，幾個獨立小故事都有不同戰爭感覺，唔錯。
同隊友一齊網上攻防戰
至於主菜梗係同Friend一齊打網上模式，今集仍然係最多4人一個小隊，大家揀定不同職業單位好重要，當然每人分工做突擊、醫療、支援同埋偵察狙擊就最好。單槍匹馬駁火未必有著數，一定要跟實隊友走一眼關七。千萬唔可以忽略救人同埋據點加固等功能，擊斃重生系統都有大改動，可以睇住隊友視點決定是否要跟佢位置復活。
今集遊戲的槍械特性更加明顯，子彈有效射程、重機槍等的後坐力等都更強，在適當時候用適當武器更加重要，今集改善咗子彈會隨機甩準星的問題，唔會再好似上集咁明明準星指住敵人個頭壓埋槍都會有幾粒子彈亂射偏，可以精準咁分到每把槍的後坐力彈軌，連射類同點射類效果明顯。而且移動的靈活性都有改善，以前只可以衝前跑趴低射擊，今集可以做埋跳起轉身180度回頭趴低開槍。而且環境互動效果更明顯，想在草叢玩伏擊，小心被壓倒嘅高草曝露行蹤。另外今集除咗槍械瞄具配件及外觀圖案可自定，連步兵身上的衫褲鞋物裝飾都可以個人化，唔會再好似以前一式一樣，萬一上到戰場殺到出晒名，肯定個個都認得係你！
多人模式夠刺激
今集多人模式有6種玩法，以往都有嘅大型征服模式、團隊死鬥等就唔洗多講，今集新加入「戰程浪潮」和「大行動」就更有漫長戰事感覺，不再是一張地圖決勝負，兩個陣營會打足「3日」，如果打到得分平手仲會進入第4日「最後一戰」玩到彈盡糧絕！另外加入「空降模式」大玩雷霆傘兵，之後將會有小隊大逃殺版本的「烈焰風暴」玩法！在不同大地圖上用載具拆樓拆戰壕玩空中轟炸係《戰地風雲》特色，今集防守方士兵仲可以用「加固」強化據點，將敵方進攻範圍收窄，戰略性更豐富，同朋友組隊開咪更好玩！
同敵軍槍林彈雨咁搶據點，點知俾敵軍掃低咗大叫救命，隊友一邊用重機槍火力壓制放煙霧彈，一邊爬過來救你復活再堆沙包，就係今集《戰地風雲5》嘅日常！如果係PS4 Pro/XBOX ONE X玩，仲可以對應4K HDR超高清畫質，爆炸火炎同硝煙都超級逼真，戴埋環繞聲喇叭或者耳機，真係會聽到戰場上好多人中槍慘叫！戰爭嘅殘酷，都係留返係遊戲入面好喇，一陣夠鐘要出門口同女朋友行街街，夜晚返嚟就要入伍同班兄弟解放法國戰線！
