Action Cam 跟極限運動算得上係最佳拍檔；戴住佢跳傘、玩越野單車、滑雪、踩板、沖浪等等嘅影片，大家應該睇過唔少。講到極限，喺無機械幫助嘅前提下，地上跑得最快嘅，相信大家都知道係獵豹（Cheetah）。根據記錄，呢隻「大貓」單靠四隻腳就可以喺 3 秒之內去到最高每小時 96 公里，快過唔少跑車！如果畀部 Action Cam 佢戴住，唔知時速 96 公里嘅感覺係點嘅呢？
美國辛辛那提動植物園（The Cincinnati Zoo & Botanical Garden）就搵咗隻佢地飼養嘅獵豹嚟做示範。工作人員將一架 GoPro HERO 3 綁在獵豹 Savannah（薩凡納）個背脊，跟住用假獵物引佢跑。結果拍成點？即刻睇片：
一如所料，由於 GoPro 綁喺獵豹個背脊上，畫面搖晃得好厲害，睇耐少少都想嘔！不過速度真係好快，最正係中間「掟彎」個畫面，會睇到獵豹好似電單車咁，向彎心方向壓低個身！睇唔清楚？影片後半段有（稍）慢鏡重播，畀大家䏲清楚啲。可惜今次示範路線短左啲，如果能夠睇到獵豹真正追捕獵物嘅畫面就正喇！
Source：CincinnatiZoo.org