之前公布的亞洲十大景點，香港的石質公園和荔枝窩榜上有名，石質公園就不多講喇，大家在北潭涌禁區前坐的士入萬宜水庫東壩睇個夠喇，今次就介紹荔枝窩。
荔枝窩不是荔枝莊，後者因為村內小廟有鬼故所以出名。荔枝窩沒有鬼怪故事，但以風景美麗成為行山熱點。嚴格來說，荔枝窩是一條村，但它所屬的地域有個更加響噹噹的名稱，叫做「印洲塘海岸公園」。顧名思義，就是行山路繞海邊而行，有海灣、內港、紅樹林，風景想唔靚都難。
去荔枝窩可以有三條路線，由鹿頸及烏蛟騰村口起步，都會經過梅子林再到荔枝窩，但因為上斜路較長，不適合初階行山人士。舒服的行山路線是入烏蛟騰村內，去完公廁就沿左邊路入（途經三椏涌 / 三椏村），怕行錯路就問人，周日行此路線的朋友多的是，旺到有時路上還會塞人。
此路線約行 2.5 小時就會到達荔枝窩，途中有山徑和海邊路，難度很低，而且各路段皆有自己的特色，慢慢行好寫意。不過始終是山路，而且有高有低，部分近海地段間中會路滑，行山人士至少穿運動鞋為宜（MK 布鞋就不要喇）。
去荔枝窩不是只有行山一味，食也是一個大項目。路過三椏村，客家菜冇得傾一定要食，當中出名的食店有合益蜂場等，三杯鴨、客家炆腩肉是招牌菜。這類行山熱點的食店，菜價也不會過份貴，一餐下來，有雞有肉有豆腐有菜之類，每人二百有找好正常，不算貴，至少啖啖食落有鄉郊感覺，好得意。
去到荔枝窩一樣有得食，村中廣場經過修葺，美觀得來可以容納更多人；最重要是廣場側的公廁翻新，靚仔晒，解決了大家的問題。
ezone.hk 記者建議初階人士在此盡興之後就行回頭路走人。皆因由荔枝窩再向前行，就要翻過梅子林上山，不停的上斜路，玩你一小時係閒閒地，而且沿途略見路徑崎嶇，有點難度。
由荔枝窩經風水林上梅子林，山徑多變，初階人士要慎行。
如果執意要行，去到該路段最高點有分岔路，一條行落烏蛟騰村，一條行經谷埔去鹿頸，兩者需時相若，後者落山後又是沿海小徑，又有小食店俾你落腳，自己諗喇！（今年起有街渡逢周日和假日行走馬料水至荔枝窩，免了腳程，但也少看了風景。查詢：2555-9269）
Source : ezone.hk