六合彩中金多寶要靠電腦?

| Leo | 17-07-2017 12:31 | |

六合彩不時都會隨不同節日、活動推出金多寶,預計頭獎獎金可高達數千萬,甚至達 1 憶元,發達唔駛靠「李加乘」!大家用大包圍方式去揀數字提高中獎機率,成本係天文數字。咁又有無方法可以降低大包圍嘅成本?《亞米路聰明組合 2017》(以下簡稱《亞米路》)可以幫到你!【2019 年 11 月更新:最新版本已更新至 2019 版,下載位置及連結相同】

先裝好《.NET Framework 2.0》

要用《亞米路》,先要裝好《.NET Framework 2.0》。《.NET Framework 2.0》係《Windows 7/8/8.1》嘅內置功能,可以用「開啟或關閉 Windows 功能」,裝返《.NET Framework 3.5》就得。如果《Windows 8.1》出現無法下載《.NET Framework 3.5》嘅問題,可以嘗試開啟「控制台\程式集\程式和功能」,點擊「檢視安裝的更新」,耍從列表中移除 KB2966826 和 KB2966828 更新。至於《Windows XP》,可以用官網提供嘅安裝檔,直接裝返《.NET Framework 2.0》。

喺《Windows 7/8/8.1》打開「控制台」,再喺搜尋列輸入「windows feature」,然後點擊「開啟和關閉 Windows 功能」。

點擊「.NET Framewrok 3.5(包括 .NET 2.0 和 3.0)」旁邊嘅空格,再按〈確定〉,就可以下載同安裝返《.NET Framework 2.0》。


「聰明組合」智選號碼

《亞米路》唔係靠估或者從玄學角度畀六合彩貼士,係純粹用數學方式進行分析同統計。好似「計算聰明組合」功能咁,正常要以複式買齊 18 個數字,需要買 18,564 注。用聰明組合呢?選用「3/5」組合(其中獎保證為:如果選中其中 5 個號碼,至少有 1 注中 3 個號碼或以上),只要買 7 注就得!即使選用中獎機率較高嘅「4/4」組合(其中獎保證為:如果選中其中 4 個號碼,至少有 1 注中 4 個號碼或以上),注數亦都可以減至 236 注。不過,用聰明組合嘅最大缺點,就係如果咁好彩真係中齊 6 個數字,亦未都必一定中到頭獎,只確保可以中到「中獎保證」內所提及嘅號碼數目。

選用「3/5」組合,用 7 注可以買到 18 個字!

選用「4/4」組合,就要用 236 注!

選用「5/5」組合,就要用 1547 注!呢個組合中大獎嘅機會係最高!

決定使用「聰明組合」後,之後最痛苦嘅程序,就係要手動逐條逐條飛買返,而且無得用「半注」買降低支出。


「下期推測」幫你揀號碼

除咗「計算聰明組合」功能外,《亞米路》仲有齊記錄 1976 年起嘅六合彩開彩記錄,每次開啟軟件時,開彩記錄都會自動更新。《亞米路》仲有「模擬對獎機」、翻看「攪珠結果及派彩」、「各號碼開獎次數」統計等功能。自問有「選擇恐懼症」,可以用「下期推測」功能,利用數學統計方式,計算出最有機會開中嘅號碼。在此提提大家,六合彩只係隨機抽獎遊戲,用得《亞米路》愈多,自然明白呢個遊戲贏嘅機會有幾低,切記唔好沉迷呀!

筆者用自選 18 個數字嘅「聰明組合」,參照 2013 年開彩記錄進行模擬對獎。結果眾望所歸,輸到開巷!

用「下期推測」剔齊你對六合彩嘅「信念」後,即時可以列出每個號碼嘅中獎機率,夠晒方便!

【資料】 

  • 軟件名稱:《亞米路聰明組合 2017》
  • 適用平台:《Windows 7/8.1/10》
  • 檔案大小:10MB
  • 軟件售價:FREE
  • 【下載位置請按此】

Source: ezone.hk
Photo:經濟日報圖片庫(主相片)

相關文章

Page 1 of 21