網民問買 MacBook 係咪不智？講真買 MacBook 嘅嘢，冇話不唔不智，不過如果係新手買 MacBook，最好梗係比較過先買，唔會 end up 先呻笨買錯機！其實 MacBook 型號眾多，分為 MacBook、MacBook Air、MacBook Pro 3 大類，兼且買嘅途徑又多，以下就有 6 點買 MacBook 必注目事項，畀大家得以買得精明。其中值得留意嘅係，要喺 Apple 官網，先有加錢升 RAM／SSD 嘅「增值服務」。
1）MacBook Family 分為 3 大類、6 個型號
要買 MacBook，首先要知道有咩型號揀，當中分為 12 吋 MacBook、11吋／13吋 MacBook Air、13吋 MacBook Pro、13吋／15吋 MacBook Pro Retina，合共 6 個型號。要求機身夠輕嘅話，MacBook 當然係最佳選擇，但如果係規格先決，可能 MacBook Pro Retina 先係合適之選。
2）官網獨家之一：增值服務
買 MacBook 嘅話，喺 Apple 官網，又或者 Apple Retail Store、指定經銷商都可選購。不過要留意嘅係，如果想為既有型號「增值」，即升級加 RAM、SSD 等配置，就只有經 Apple 官網訂購，方能辦理。
3）官網獨家之二：買翻新機
如果手頭較緊，但又想買 MacBook，另一個途徑係可於官網選購翻新機，當中多係舊機翻新嘅型號，例如現時官網所見，舊到 2012 年 6 月推出嘅 13.3 吋 MacBook Pro 都有！但當然，想買新少少嘅 model，一樣有得揀，例如上年推出嘅太空灰色 12 吋 MacBook。
4）官網獨家之三：去教育商店買機
更手頭緊嘅朋友，不妨一到官網內嘅教育商店選購合適型號，優惠適用於大專院校學生、收到大專院校取錄通知書的學生、為大專院校學生購物的家長、各級別教師及教職員。另外一提，每年暑假，品牌都會有 Back to School 優惠，上年就有平價買機，兼送 Beats 耳機優惠，唔知今年又會有咩超筍 promotion 呢？
5）必買 AppleCare 延長機身保養
用得 MacBook，應該唔會想用一年半載就換機，所以買定 AppleCare 3 年期延長保養服務，之後機身有咩問題要整機，都唔使令銀包大出血（利申：MBA 壞咗 board，過保養整機價盛惠 $3 千幾）！要留意嘅係只有 MacBook 仍在 1 年標準有限保障期內，才可以購買 AppleCare Protection Plan 全方位服務計劃。
6）分期付款需另找 card centre 處理
如果諗住分期畀錢買機嘅朋友，要留意嘅係宜家 Apple 官網買機已不設指定信用卡分期付款機制，因此堅持想分期嘅朋友，需要另外聯絡 card centre 處理，但當然可能需另收手續費，詳情請向發卡銀行查詢。不過如果想真係想慳到盡用免息分期，去豐澤一類嘅大型電器連鎖店購買就 OK，但缺點係冇得加錢升級換 RAM／SSD，只有既定規格產品可選。
Source: ezone.hk
【專題報道】