遊日本自駕遊注意事項(上)

| WilliamS | 09-06-2016 18:58 | |

自由行遊日本,唔少人都會玩自駕遊,自己租車去不同地方,時間更彈性之餘,對於同行親友,尤其是年長或小朋友,亦會較為舒適。不過去日本自駕遊,看似容易,但其實有唔少注意事項,都值得自駕新手留意。ezone.hk 有唔少記者都愛自駕遊日本,以下就分享少少第一身經驗。

01:綠燈轉彎記得睇人又睇車

可能你已經擁有幾十年香港駕車經驗,但去到日本,即使同屬右軚,自駕遊都要小心,尤其在市區燈位。十字路口中,若閣下準備轉左,即使前方是綠燈,當你轉左入彎時,都唔好老定,因為呢個時候,隨時會有行人在「綠公仔」的情況下過緊馬路。你又係綠燈,佢又係綠燈?係呀,其實全球唔少地方都係咁,反而係香港系統太安全。在日本,汽車必須讓行人先行,因此即使你係綠燈轉左,見到行人過緊馬路或即將過馬路,你都要停車待行人過完馬路才可前行。

十字路口想轉右又如何?綠燈轉右你更要睇清楚,因為對頭車「直行」方向同樣是綠燈,你以為綠燈轉右乜都唔理,就會隨時出事!好簡單,大家每次十字路口綠燈轉右時,都當係香港的「袋口位」處理,睇清楚對面方向有無車先好行。

留意,同一個燈位,駕車人士係綠燈,行人過路都有機會係綠燈,要睇清楚!

02:公路無街燈唔奇

在香港駕車,就算玩到上山頂,都好難搵到一條路係完全無街燈。但去到日本自駕遊,不少國道(一般公路幹線),甚至是自動車道(高速公路)都會無街燈。以較多港人自駕遊的沖繩為例,連接沖繩島南北的國道 58 號,有不少路段都係無街燈。夜晚行車時除要份外小心,必要時要善用高燈。  

唔少自駕遊新手都會選擇沖繩作為第一個自駕城市,但其實沖繩都有唔少路段係無街燈。日頭行車,當然無問題,但夜晚就要小心。

03:善用中途休息站

在香港駕車,好少話要中途停低休息,但去到日本自駕遊,尤其是長途車程就記得善用中途休息站,日文稱為「道之驛」。日本的自動車道沿途都有不少「道之驛」,唔單止有基本的洗手間、油站等設施,部分更會有餐廳、手信商店以至觀光台。普遍租車公司提供的 GPS 車機,都會提供「道之驛」情報,假設經自動車道由 A 點去 B 點時,途中經過每一個出口(IC),若該地點設有「道之驛」都會有提示,例如以圖示顯示設施種類等。接近休息站時,按路牌指示即可駛至泊車。以記者最近一次由名古屋市中心駕車上富山為例,車程近 3.5 小時,經東海北陸自動車道行仲會有勁多條又直又長的隧道,中途唔休息真係好難頂兼好危險。

從名古屋經東海北陸自動車道上白川鄉,有不少「道之驛」,裡面有好多手信買。

04:想靠泊車 sensor 都難

駕車經燈位要小心,長途車要善用休息站,泊車又有無難題?睇你平時在香港泊車,有無過份依賴泊車 cam 或泊車 sensor 啦!小記幾次去日本自駕遊,唔知係唔好彩定因為租車公司一般都會選用配備較「基本」的車型,租用的汽車都係無泊車 sensor(即係平時泊車會 bebe 聲那種),後泊 cam 當然更加欠奉!如果閣下平時在香港泊車依賴這些科技,去到日本就要望清楚幾塊鏡,亦唔好依賴架車有聲提你「到喇」!必要時,搵同行朋友幫手睇位都係安全上策。

租車公司提供的汽車,多數無泊車 cam,想好似自己架車咁用車機芒睇後面,你就想喇!

遊日本自駕遊注意事項(下)

Source:ezone.hk

 

Page 1 of 16