你真係識玩 YouTube? 教你 5 個隱藏睇片神技

| 費安 | 18-03-2016 23:06 | |

相信唔少人經常都會上 YouTube,可能去睇睇 follow 緊嘅 YouTuber 有冇上載新片,或者瀏覽搞笑影片,成日一睇就會睇幾個鐘停唔到。不過就算每日上 YouTube,都可能有啲隱藏應用技巧係你唔知嘅,等 ezone.hk 同大家介紹幾個唔係個個都知道嘅 YouTube 技巧啦!

1. 改 Link 下載 YouTube 影片

想下載 YouTube 影片,其實唔需要安裝任何外掛程式,只要改一改條 link,在網址「www.」同「youtube」中間加上「link」就可以輕鬆下載 YouTube 上嘅影片。進入下載頁面後仲有唔同格式同解像度可以選擇添!不過提提你,呢個方法由 Save-Video.com 提供,並非 YouTube 官方功能,用戶下載影片時,亦要注意版權問題呀!

2. Right Click 循環播放

在呢個技巧剛推出時 ezone.hk 已經同大家睇過,就係可以在網頁版上循環播放影片。唔少人都鍾意用 YouTube 聽歌,唔止播 MV,亦有人鍾意聽 YouTuber 唱 cover 歌。現在只要在影片內 Right Click,就會有個灰色小視窗彈出,按一下上面嘅「循環播放」,之後就可以將 YouTube 放在後台播歌喇。

3. 指定影片開始時間

唔少人發現有趣嘅影片時,都會將 YouTube 嘅 link Copy and Paste 分享俾朋友睇。有時候短片太長,朋友可能要睇好耐先到影片高潮部分又或者學生哥做 Present 時將條 link 放入 powerpoint,如果想播放嘅內容在影片中間,load 玩段片再慢慢搵想播嘅地方都幾尷尬。其實在分享影片嘅 link 旁邊,有一個「開始時間」,只要剔選方格,就會將分享出去嘅 link 改為在特定時間開始。如果想以嵌入形式分享,就可以在影片網址後加上時間,如想在 1 分 26 秒開始,就加上「#t=01m26s」。

複製 link 時可以剔選「開始時間」。

若想嵌入影片,就要在 link 後加上時間。

4. 關鍵字搜尋法

每日都有好多影片會被投稿到 YouTube,但係有時咁多資源都未必係好事,因為當想搜尋指定內容時,往往會有好多標題內有類似字眼嘅影片會彈出嚟,可能要睇兩三頁搜尋結果先會搵到想要嘅影片。如果想完全搜尋某個關鍵字,只要在搜尋位置大上「allintitle:」再輸入關鍵字,YouTube 就只會顯示完全符合該關鍵字嘅結果。

5. 按「K」暫停影片

唔知大家有冇試過睇 YouTube 時想按空白鍵暫停影片,結果卻暫停唔到,但瀏覽器頁面就碌咗落下面呢?呢個時候就要用滑鼠按一下影片視窗,然後空白鍵先可以用來暫停影片。但原來在鍵盤上有其他掣可以控製到 YouTube 嘅播放器。按一下「K」就能夠暫停或播放影片、「J」同「L」就能夠向前或後退 10 秒、左、右鍵可以向前或後退 5 秒、「F」係全熒幕、「M」係靜音、「C」係字幕、而數字 1 至 9 就會將影片分為 10 個小片段,能夠瀏覽唔同位置。

 

Source: ezone.hk

 

Page 1 of 21