有時在 Office 做野做到攰，打工仔們都可能會用電腦上吓 Facebook、睇吓其他野鬆一鬆。唔知大家有冇試過用電腦做緊其他野嘅時候，咁啱老細殺到埋身俾佢發現呢？ezone.hk 今日就教大家幾個 Keyboard 上嘅捷徑，包括如何快速返回桌面，等大家以後唔駛再驚俾老細發現你睇緊私人嘢啦！
1. Windows 鍵 + D
第一個就教大家點樣半秒（睇你動作有幾快喇）令電腦彈回桌面先。雖然依家較新版本嘅 Windows 只要用滑鼠按屏幕右下角就能夠返回桌面，但老細行到埋身都難免有手震嘅時候。按 Keyboard 嘅實體鍵就點都穩陣點，只要同時按 Windows 鍵同 D，電腦就能夠自動將所有視窗縮到最細，快速顯示返桌面。
2. Windows 鍵 + L
大家在 Office 總有需要離開座位嘅時候，如果電腦裡面有機密文件，或者唔鍾意俾人亂掂自己部電腦，就可以同時按 Windows 鍵同 L 去鎖住屏幕。如果設有登入密碼，就會要求用家再次輸入密碼先可以解鎖。呢招仲可以用來避免被朋友在自己離開電腦時，在自己嘅 Facebook 上面亂 po 野添。
3. Windows 鍵 + E
Windows 鍵加 E 能夠直接打開「我的電腦」，大家以後要開「我的電腦」搵 File，都可以一秒 KO 啦。
4. Windows 鍵 + R 再輸入 "osk"
同時按下 Windows 鍵同 R 就會出現「執行」視窗，在「執行」視窗中輸入「osk」然後按「Enter」，熒幕上就會出現一個虛擬鍵盤。而且在實體鍵盤上按鍵，亦會顯示在虛擬鍵盤上。
5. Windows 鍵 +「+」鍵
睇圖片嘅時候可以用 Windows 鍵同 + 鍵，如果覺得圖片太細，就可以同時按呢兩個鍵去放大圖片。而用 Windows 鍵同 - 鍵就可以縮細圖片。
6. Ctrl + Tab / Ctrl + W
依家好多瀏覽器都會在同一個視窗內開幾個頁面，按 Ctrl 加 Tab 就能夠在視窗內切換頁面，而按 Ctrl 加 W 就可以關閉當前嘅頁面。呢招特別適合筆電用家，就算冇滑鼠，都能夠更方便快捷咁瀏覽唔同網頁。
Source: ezone.hk