珪藻土地浴室地墊出現已有一段日子，呢塊地墊一般唔平，賣點係快乾、吸水強、防菌防塵蟎又唔使洗，珪藻土地浴室地墊既品牌亦有好多，如 soil、fujiwara、PURE REFRE、MOISS，以上都係日本製，而今次開箱既係近日劈至半價既由 e.window 代理既珪藻土浴室墊，包裝同 759 阿信屋的一樣。花紋圖案得大小波點，沒有其他顏色選擇。
地墊好重手
今次特價既珪藻土浴室墊 ezone.hk 喺一田買，$188 會員九折，只有 size L。ezone.hk 記者以為係軟身的浴室墊，原來佢係一塊「板」，幾重身，都成約 2kg 重，如果買時有其他野買，要三思 (即使有手抽)。另外，由於好重下，如果屋企有小朋友，真係小心睇住唔好俾佢地拎起玩。
size L 的珪藻土浴室墊同 ezone.hk 屋企用開既差唔多大細。浴室墊 60cm 濶 x 39cm 長 x 0.9cm 厚，一面有波紋光滑，另一面較粗糙，說明書標明兩面均可用。另外附設防滑墊，可以加強防滑效果，同埋附設沙紙用嚟清潔呢張珪藻土浴室墊。
珪藻土吸濕原理
珪藻土為一種天然礦物，具調濕功能，能自行吸水及釋放水份，這是因為珪藻土表面有無數細孔，所能能作調濕之效。同時，珪藻土有除臭功能，故有效抑制塵蟎、黴菌的繁殖。講到咁神奇，究竟效果係點？睇 ezone.hk 同你實試珪藻土浴室地墊！
珪藻土浴室吸水地墊最近劈至半價，加埋佢既神奇吸水防臭免洗特性，ezone.hk 已經帶咗佢返屋企，放咗係浴室試用，效果係點？即睇睇~
先度 size
温提購買任何產品，都要要求開箱檢查，ezone.hk 小記就中咗招，一開箱，珪藻土速乾地墊已經有漬……不過，最緊要佢既效果係點！另外，係因為小記唔好彩？塊地墊有一陣土青味 (友人話，用珪藻土做嘛，天然礦物梗係有啲味架啦)
大小其實同其他差唔多，但由於幾厚 (0.9cm)，建議買前先諗諗你想放喺浴室邊個位，如果門下，ezone.hk 小記既門就唔成功了。
放於企缸對出，嗯…ezone.hk 小記地方偏細，買了張 size L 的，似乎…唔多合襯~
吸水能力
沖涼若不小心花濕潑至地墊，即刻吸水。ezone.hk 小記濕腳，只印乾腳面，踏下去嗰刻，真係 feel 到即刻吸水，不過建議唔好踏一下就以為吸晒水，仲有腳趾隙之間的水點，建議踩多幾下，咁就真係乾喇~最啱洗腳唔抹腳既人，唔會搞到周圍水漬跣到屋企人。
快乾能力
睇說明書，約 10 分鐘後會冇晒水漬，但 ezone.hk 小記用後，10 分鐘後仍有水漬，即使過咗 30 分鐘依然「健在」…可能因為小記既浴室濕度太高？(今天睇天文台，濕度 87%)。不過，用紙巾或手在地墊上抹，又真係乾爽喎，咁嚟講又真係「快乾」。至於除臭能力，因只是用了一段時間，暫時冇霉味。
珪藻土浴室地墊咁硬，好似好難處理？啲水係咁吸自己乾由佢真係得？除了同你試咗吸水效果，再睇下應該點保養吧。
每個牌子既珪藻土浴室地墊保養方法都有少少分別，有啲可以用水洗一陣，有啲可以曬一陣，而呢隻特價緊既珪藻土容室地墊，保養上要留意以下幾點：
●唔可以直射陽光同用喺地暖房，喺陰涼通風地方晾乾就可以了，建議夏天一星期晾乾一次，冬天三天一次。注意都唔好用風筒、暖爐等加熱吹乾。以此同理，如果裝有浴室寶，要留意出風口係咪吹正個地墊了。
●唔好用表面活性劑清潔，即唔好用你用開既清潔用品，簡單嚟講，唔好理佢，由佢「自濕自乾」。
●真係污糟咗的話，可以用附設送既砂紙，或自行準備 (約 400 號)，刨走表面污糟野就得了，刨完後，再用乾布抺走啲粉末就得了。就咁睇，即係塊地墊會愈磨愈薄，地墊咁厚，都可以講幾㩒用喎。
