你有冇試過係電腦安裝某類 Freeware 免費軟件時，佢會偷偷地安裝其他軟件，耗用資源嘅同時，甚至是連你網頁瀏覽器的首頁都改埋，兼唔畀你再改。呢類被稱為「綁架軟件」的東西，唔少都係國產軟件，有部分甚至本身係「網絡保安」及「防毒」軟件。台灣就有網民一口氣係電腦安裝 13 款國產綁架軟件，睇睇邊一款係皇者中嘅皇者，榮登「最毒」寶座！
呢位網友就模擬一個規格屬四核心、約 2GB RAM 嘅虛擬電腦，來安裝 13 款國產軟件，睇睇邊款「最毒」，當中包括：360 瀏覽器、360 安全衛士、hao123 快捷程式、金山毒霸、百度衛士、瑞星殺毒軟件、快播插件等等。
逐一下載及安裝之時，已有 Google Chrome 網頁瀏覽器率先認定瑞星殺毒軟件是惡意軟件，直接作出封鎖，網友為作實測，當然直接還原安裝，以身犯險！之後，在安裝 hao123 快捷程式時，就發現其提示怕用戶的瀏覽器首頁被綁架，所以率先綁架用戶的首頁。
之後，網友一直安裝其他綁架軟件，發現只係安裝了 4 個程式，但已有多達 13 個程式介面於桌面上， 電腦更開始欠缺反應。網友更發現每安裝一個安全衛士或殺毒軟件，都會表明電腦有風險需要優化。
及後，再繼續安裝，所耗用嘅時間已經愈來愈耐，而電腦亦已接近無反應，需時 10 多分鐘才開始彈出各個綁架軟件的介面，當中金山毒霸更彈出信息指，可以為電腦加速，並且清理 1.03GB 垃圾。之不過，網友就好幽默咁表示，新嘅虛擬電腦竟然可以清理成 1GB 嘅垃圾，難道係想將整個 Windows 刪除？
由於電腦 lag 到不行，所以網友決定先強制關機，再於安全模式下再開啟電腦；第一個壯烈犧牲嘅軟件就是瑞星殺毒軟件，網友表示因為佢連 Google Chrome 都過唔到，所以犧牲份屬正常。最後，經過 10 多鐘後，網友發現其他的綁架軟件竟然可以和平相處，佔用 100% 的 CPU 使用率，以及一半的記憶體，結果可以話係出人意表！
Source：ezone.hk、ck101